مسلمان پنجابی نوں ھن کرنا کی چائی دا اے؟

سکھاں نال لڑائی پنجابی ھون دے کرکے نئیں مسلمان ھون دے کرکے ھوئی تے شروع وی پنجاب چوں نئیں پنجاب توں باروں مسلمان تے ھندو دے کرکے ھوئی.

پنجابی دی جے گل کیتی جائے تے فر مسلمان پنجابی سب توں بہت نے 56٪. اس تو بعد ھندو پنجابی 26٪. سکھ تے ھین ای 14٪. جد کہ عیسائی پنجابی صرف 4٪ نے.

ھن گل سمجھ نئیں آندی کہ ونڈ توں پہلوں فساد پنجاب توں باروں شروع ھویا تے او وی مسلمان تے ھندو دا پر مارے 20 لکھ پنجابی گئے او وی مسلمان تے سکھ ' نالے پنجاب وچ؟ 

 پنجاب وچ ھندو پنجابی تے سکھاں نالوں بھتے سن۔ لڑائی وی اصل وچ مسلمان تے ھندو دی ای شروع ھوئی سی ' او وی پنجاب توں بار . پھر پنجاب وچ وی لڑنا مسلمان تے ھندو نوں چائی دا سی؟

 پرانیاں گلاں نوں چھڈ کے ھن اے گل کرنی چائی دی اے کہ مسلمان پنجابی نوں ھن کرنا کی چائی دا اے ؟

 غیر مسلم پنجابی سانوں ایس لئی وارا نئیں کھاندا کہ اس نال مذھب دے کرکے ساڈی نئیں بن سکی.

مسلمان غیر پنجابی نوں اسیں ایس لئی وارا نئیں کھاندے کہ اسیں پنجابی آں.

ونڈ توں بعد ھن پہلے جئی گل تے ھو نئیں سکدی. مسلمان تے سکھ پنجابی کول اپنا اپنا ملک اے ' رینا تے انا نے ھن اپنے اپنے پاسے ای اے. کٹھے نہ سئی گوانڈ ای سئی.

اے وی مسلمان پنجابی دا مسئلہ نئیں. سکھ پنجابی دی مرضی اے کہ ھندوستان وچ رین یا آزاد ھو کے مسلمان پنجابی دے گوانڈی بن کے رین یا مسلمان پنجابیاں نال رل مل جان تے پنجاب نوں پہلوں وانگر فر اک سیکولر دیش تے پنجابی قوم نوں اک سیکولر قوم بنان لئی مسلم پنجابی قوم پرستاں دے موڈے نال موڈا جوڑ لین۔

 ھندو پنجابی اک تے کھلریا ھویا اے. دوجا او پنجابی توں بوھتا ھندو اے تے بولنا وی پنجابی دے بجائے ھندی ای پسند کردا اے. تیجا ھندو پنجابی نال مسلمان پنجابی دا گوانڈ وی نئیں لگدا. ایس کرکے ھندو پنجابی نال تے اگے جا کہ وی مسلمان پنجابی نوں منہ متھے لگن دی لوڑ ای نظر نہیں آندی.

باقی رہ گئے عیسائی پنجابی. اک تے اے عیسائی پنجابی اھل کتاب ھون دے کرکے دیندار ای نے تے دوجا مسلمان پنجابیاں نال رلے ملے ھوئے نے.

ایس ویلے مسلمان پنجابی نوں مسئلہ اے نئیں کہ گریٹر پنجاب بنے یا نہ بنے یا مسلمان پنجابی تے سکھ پنجابی اک ھو جان.

مسئلہ اے وے کہ پہلوں مسلمان پنجابی ' پنجاب نوں سمبھالے. پنجاب زبان ' تہذیب ' ثقافت نوں وادھا دے وے. مسلمان پنجابی قوم نوں مظبوط سیاسی ' سماجی ' معاشی تے اقتصادی قوم بنائے. جیس لئی پنجابیاں نوں طے کرنا پوے گا کہ پاکستان وچ پنجابیاں دے غیر پنجابی مسلماناں نال کیس طراں دے تعلقات ھونے چائی دے نے تے گوانڈ وچ جیڑے غیر مسلمان پنجابی نے انا نال کیس طراں دے تعلقات ھونے چائی دے نے.

اک گل پنجابیاں نوں اے وی یاد رکھنی چائی دی اے کہ بین الاقوامی طاقتاں دے کھیل دا اثر وی قوماں تے پیندا اے.

ایس ویلے وی پنجاب دے اگے پچھے بین الاقوامی طاقتاں دا کھیل ھو ریا اے. ھر کسے دا اپنا اندازہ ھوندا اے. میرے اندازے دے مطابق ایس کھیل دے نتیجے وچ یا تے بلوچستان نوں پاکستان تو وکھرا کر دتا جانا اے یا فر کشمیر تے ھندوستانی پنجاب نے ھندوستان تو وکھرے ھو کے پاکستان نال الحاق کر لینا اے.

ھووے جو وی پر ایس ھون نا ھون وچ سب توں وڈا کردار مسلمان پنجابی دا ای ھونا اے. ایس لئی پنجابیاں نوں جوش دے نال نئیں حوش نال کم لینا پینا اے.

پاکستان بنن تو پہلوں وی بین الاقوامی کھیل ھویا سی ' جیس دے کرکے پاکستان بنیا۔ پر اوس ویلے وی پنجابیاں نے جوش ای وکھایا حوش نال کم نہ لیتا۔ ایس کرکے ای اے 20 لکھ پنجابی مروا بیٹھے ' 2کروڑ پنجانی دربدر ھوئے ' پنجاب وی ونڈوا بیٹھے. فائدھ یا تے ھندو چک گئے تے یا فر غیر پنجابی مسلمان.

 پنجابی ھن وی 68 ورھیاں تو پاکستان نوں بچان وچ وی لگے ریندے ئے تے بنان وچ وی۔ پر فر وی پاکستان توں بار دے دشمن تے اپنے تھاں ' پر اے غیر پنجابی مسلمان پاکستانی وی' اک پاسے پنجاب تے پنجابیاں نوں گالاں کڈھدے ریندے نے تے دوجے پاسے اے غیر پنجابی مسلمان پاکستانی ' پنجاب تے پنجابیاں دیاں جڑاں وڈھن وچ لگے ریندے نے.